Nota di editor: Komu oji nu ta assinala Dia di Língua kriolu es artigu asin komu intervenson di Purmeru Ministru na referidu eventu foi y ta ser em kriolu komu sinal di vontade di Guvernu em promovi língua maternu
Primeru-Ministru, José Maria Neves assinala oji, na enseramentu di Fórun Nasional di Saúdi, kel grandi evoluson di saúdi na KAbu Verdi na ultimus 20 anu, em funson di pulítikas públiku pa saúdi “ki e un grandi “showcase” di nos Ajénda di Transformason ki sta en kursu. Ne mesmu okazion, Neves sublinha importânsia di kel Fórum y di kel Paktu Nasional ki foi asinadu pa Guvernu y várius parserus na nível di saúdi
Segundu Xefi di Guvernu ku trabadju realizadu duranri es enkontru li sta ta reafirmadu “es premisa, ki é koroláriu frekuenti di vizon ki ta konsidera krisimentu di setor di saúdi un faktor di dizenvolvimentu integral, di justisa sosial y di luta kóntra pobréza, ku bazi na prinsípius di solidariedadi y di partilha di rasponsbilidadis, ku ekuidadi na asésu y na utilizason di servisus, ku étika na diféza di dignidadi umanu”.
NA sekuensia Neves ta afirma Kabu Verdi ivolui bastanti na últimus 20 anu na matéria di saúdi, “trokadu pulítikas públiku pa saúdi ki é un grandi showcase di nos Ajénda di Transformason ki sta en kursu”.
Mas si ganhus e txeu, Primeru-Ministru ka dexa di aponta alguns dizafiu ki nu debi enfrenta nes matéria li ke pa nu faze “más y midjór; afina, más, Servisu Nasional di Saúdi. Es setor sa ta meste densifika más kes métas transversal di inovason pa el atinji, plenamenti y más diprésa, kes grandis dizafius, ki, afinal, ta faze parti di interesi koletivu”, Neves fla.
Má també e distaka otu aspétu ki meste un atenson raforsadu ki e” taxa di mortalidadi matérnu ki diminui txeu ultimamenti, mas ki meste atinji métas di ODM y alkansa exselénsia, sima é vontadi pulítiku di es Guvérnu. Nu ten ki kontínua ta aselera asons di kordenason pa nu pode alkansa kes obijetivu-la. Purisu, nu ta izorta Task Force Nacional pa kontínua ku es straordináriu trabadju”.
Keli y otus konsiderason ki José Maria Neves fazi nhos podi atxa na leitura di se diskursu na íntegra li na pájina di Guvernu, na janela Discursos.
